ഓൾഡ് ട്രാഫോർഡിൽ ചെൽസി-മാഞ്ചസ്റ്റർ യുണൈറ്റഡ് പോരാട്ടം സമനിലയിൽ

ഇംഗ്ലീഷ് പ്രീമിയർ ലീഗിൽ ഇന്നലെ നടന്ന വമ്പൻ ടീമുകളുടെ മത്സരത്തിൽ മാഞ്ചസ്റ്റർ യുണൈറ്റഡും ചെൽസിയും സമനിലയിൽ പിരിഞ്ഞു. ഓൾഡ് ട്രാഫോർഡിൽ നടന്ന മത്സരത്തിൽ മത്സരം 1-1 സമനിലയിലവസാനിച്ചു. ഇരു ടീമുകളും ശ്രദ്ധയോടെ കളിച്ച മത്സരത്തിൽ അധികം അവസരങ്ങളുണ്ടാക്കാൻ ഇരുവര്‍ക്കുമായില്ല. റാഷ്ഫോർഡിന്റെ ഒരു ഷോട്ട് പോസ്റ്റിൽ തട്ടി മടങ്ങിയതായിരുന്നു ആദ്യ പകുതിയിലെ ഏറ്റവും മികച്ച അവസരം.

രണ്ടാം പകുതിയിലും കളി അങ്ങനെ തന്നെ തുടർന്നു. മത്സരത്തിന്റെ 70-ാം മിനിറ്റിൽ മാഞ്ചസ്റ്റർ യുണൈറ്റഡിന് അനുകൂലമായി പെനാൽറ്റി വന്നു. റാസ്മസ് ഹോയ്‌ലുണ്ടിനെ ചെൽസി കീപ്പർ സാഞ്ചസ് വീഴ്ത്തിയതിന് കിട്ടിയ പെനാൽറ്റി നായകൻ ബ്രൂണോ ഫെർണാണ്ടസ് ലക്ഷ്യത്തിലെത്തിച്ചു. ഗോൾ വീണതോടെ ചെൽസി ആക്രമണങ്ങൾക്ക് മൂർച്ച കൂട്ടി. 74-ാം മിനിറ്റിൽ കൈസേദോയുടെ ഒരു ഗംഭീര സ്‌ട്രൈക്കിൽ ചെൽസി സമനില പിടിച്ചു. തകർപ്പൻ വോളിയിലൂടെയായിരുന്നു കൈസേദോയുടെ ഗോൾ. ശേഷം വിജയഗോളിനായി ഇരുടീമുകളും ആഞ്ഞുശ്രമിച്ചെങ്കിലും ഗോൾ നേടാനായില്ല. സമനിലയോടെ മാഞ്ചസ്റ്റർ യുണൈറ്റഡ് 12 പോയിന്റുമായി 13-ാം സ്ഥാനത്തെത്തി. ചെൽസി 18 പോയിന്റുമായി നാലാം സ്ഥാനത്തുമെത്തി.

Content Highlights: English Premier League manchester united vs chelsea